ជនរួមជាតិនៅហាមយ៉ាងទទួលបុណ្យសែនដូនតាដោយក្តីរីករាយ
ក្នុងឱកាសបុណ្យសែនដូនតាឆ្នាំនេះ គ្រួសារដែលបានឧបត្ថម្ភសង់ផ្ទះនៅភូមិជ្រោយទន្សា ឃុំហាមយ៉ាង ខេត្តវិញឡុង មានក្តីរីករាយបន្ថែមពេលបានរស់នៅក្នុងផ្ទះថ្មីដ៏រឹងមាំ។ ការយកចិត្តទុកដាក់របស់បក្ស និងរដ្ឋ ជួយប្រជាជនកាត់បន្ថយការព្រួយបារម្ភ ផ្តល់កម្លាំងចិត្តបន្ថែមក្នុងពលកម្ម និងកែលម្អជីវភាពជាបណ្តើរៗ។
បងស្រី ថាច់ធីណារី បានរដ្ឋឧបត្ថម្ភសង់ផ្ទះថ្មី។
បងស្រី ថាច់ធីណារី នៅភូមិជ្រោយទន្សា ទទួលបុណ្យសែនដូនតាក្នុងផ្ទះថ្មីដោយក្តីរីករាយ។ គ្រួសារបងស្រីជាគ្រួសារក្រីក្រ ប្រកបរបរធ្វើការឈ្នួលជាសំខាន់ ប្រាក់ចំណូលគ្រាន់តែគ្រប់ចាយវាយប្រចាំថ្ងៃប៉ុណ្ណោះ។ ការសន្សំប្រាក់ដើម្បីសង់ផ្ទះរឹងមាំនោះគឺហួសពីលទ្ធភាព។ ពេលបានរដ្ឋជ្រើសឧបត្ថម្ភសង់ផ្ទះ បងស្រីមានសេចក្តីត្រេកអរក្រៃលែង ពីព្រោះក្តីស្រមៃតាំងពីយូរលង់ ឥឡូវបានក្លាយជាការពិត។ បងស្រី ណារី ឱ្យដឹងដោយក្តីរំភើប៖ "គ្រួសារខ្ញុំគ្មានដីផលិត ប្រកបរបរ ធ្វើការឈ្នួលជាសំខាន់ ម្ល៉ោះហើយគ្មានលទ្ធភាពសង់ផ្ទះ។ ឥឡូវបានរដ្ឋឧបត្ថម្ភសង់ផ្ទះ ខ្ញុំមានក្តីត្រេកអរក្រៃលែង ខ្ញុំសូមថ្លែងអំណររគុណបក្ស និងរដ្ឋយ៉ាងខ្លាំងដែលបានយកចិត្តទុកដាក់"។ ចំពោះបងស្រី រដូវបុណ្យសែនដូនតាឆ្នាំនេះកាន់តែមានអត្ថន័យ ពេលបានជួបជុំគ្រួសារក្នុងផ្ទះថ្មី។ នេះជាឱកាសរំលឹកនឹកគុណដល់ជីដូនជីតា និងដាស់តឿនកូនចៅពីមនោសញ្ចេតនាគ្រួសារ។ លែងបារម្ភពីផ្ទះស្នាក់នៅ បងស្រីមានកម្លាំងចិត្តបន្ថែមក្នុងការពលកម្ម សន្សឹមៗកែលម្អសេដ្ឋកិច្ច និងគិតគូរដល់សមាជិកគ្រួសារបានល្អប្រសើរជាងទៀត។
អ្នកមីង ង្វៀងធីនៀង (ខាងស្តាំ) ជាមួយនឹងកម្មាភិបាលភូមិភាគក្នុងផ្ទះថ្មី។
នៅភូមិជាមួយអ្នកមីង ង្វៀងធីនៀង កើតឆ្នាំ ១៩៤៧ ជាគ្រួសារគោលនយោបាយ ទើបមានផ្ទះថ្មីសមរម្យ។ ឆ្នាំ ២០០៦ អ្នកមីងបានប្រធារដ្ឋជូនគ្រឿងឥស្សរិយយសចំណាត់ថ្នាក់លេខ១ ពីព្រោះមានស្នាដៃក្នុងសម័យសង្គ្រាមប្រឆាំងអាមេរិកសង្គ្រោះជាតិ។ ឥឡូវមានវ័យចំណាស់ហើយ គាត់រស់នៅជាមួយចៅ។ ពីថវិកាបានឧបត្ថម្ភ៥០លានដុង រួមជាមួយទឹកប្រាក់ដែលបានសន្សំរបស់សមាជិកគ្រួសារ ផ្ទះថ្មីបានសង់ឡើងជួយឱ្យអ្នកមីងមានកន្លែងស្នាក់នៅពេលវ័យចំណាស់។ នេះជាប្រភពលើកទឹកចិត្តចំពោះអ្នកបានរួមចំណែកក្នុងសម័យសង្គ្រាម ទន្ទឹមនឹងនោះបង្ហាញពីការគិតគូរចំពោះមុខសញ្ញានយោបាយនៅភូមិភាគ។ មីងនៀង ឱ្យដឹង៖ គាត់មានក្តីត្រេកអរក្រៃលែង ពីព្រោះចាប់ពីពេលនេះ ទាំងពីរនាក់យាយចៅមានកន្លែងនៅងាយស្រួល លែងព្រួយបារម្ភពីកន្លែងនៅទៀត។ ប្រាក់សន្សំសំចៃរបស់សមាជិកក្នុងគ្រួសារ រួមជាមួយនឹងទឹកប្រាក់ឧបត្ថម្ភ ធ្វើឱ្យក្តីស្រមៃតាំងពីយូរលង់បានក្លាយជាការពិត។ ទទួលបុណ្យសែនដូនតាក្នុងផ្ទះថ្មី គាត់មានចំណាប់អារម្មណ៍ច្បាស់ពីការយកចិត្តទុកដាក់របស់រដ្ឋអំណាច។ មានអាយុជិត៨០ឆ្នាំ ក្តីសង្ឃឹមរបស់អ្នកមីងគឺមានជីវភាពសុខសាន្តជាមួយចៅ។ ព្រោះហេតុនោះ មានផ្ទះថ្មីមានអត្ថន័យជាក់ស្តែង ជួយឱ្យអ្នកមីងស្ងប់ចិត្ត។
តាមប្រសាសន៍លោក ញ៉ាងដុង ប្រធានគណះប្រជាជនភូមិជ្រោយទន្សា ជាភូមិឋានមានជនរួមជាតិខ្មែររស់នៅកុះករ និងប្រកបរបរកសិកម្មជាសំខាន់។ គ្រួសារមួយចំនួនខ្វះដីផលិត ចាំបាច់ត្រូវធ្វើការឈ្នួល ប្រាក់ចំណូលបន្តិចបន្តួច ហេតុនោះគ្មានលក្ខណៈសង់ផ្ទះរឹងមាំ។ ចំពោះតម្រូវការនោះ ភូមិភាគបន្តត្រួតពិនិត្យស្ថានភាពគ្រួសារនីមួយៗ ដើម្បីស្នើឧបត្ថម្ភបានទាន់ពេលវេលា។ ទិសដៅគឺជួយប្រជាជនមានកន្លែងស្នាក់នៅលំនឹង ស្ងប់ចិត្តពលកម្មផលិត។ ការក្តោបក្តាប់ស្ថានភាព ក៏បង្កមូលដ្ឋានដើម្បីកំណត់ច្បាស់ស្ថានភាពដែលអាទិភាព នាំគោលនយោបាយដល់ចំមុខសញ្ញា។
រឿងរ៉ាវរបស់បងស្រីណារី និងមីងនៀង បញ្ជាក់ឱ្យឃើញពីអត្ថន័យជាក់ស្តែងនៃការងារគិតគូរផ្ទះសម្បែងនៅមូលដ្ឋាន។ ផ្ទះរឹងមាំជួយអ្នកក្រីក្រកាត់បន្ថយបន្ទុក បង្កលក្ខណៈផ្តុំកម្លាំងរកស៊ី; ចំពោះអ្នកមានវ័យចំណាស់ នោះគឺជាកន្លែងបង្អែក និងកន្លែងសម្រាក។ ការព្រួតដៃរបស់រដ្ឋបាននាំមកការផ្លាស់ប្តូរជាក់ស្តែងដល់គ្រួសារដែលទទួលផល។ ក្នុងរដូវបុណ្យសែនដូនតា ជួបជុំក្នុងផ្ទះថ្មីកាន់តែញ៉ាំងឱ្យក្តីត្រេកអរកាន់តែពេញលេញ រួមចំណែកផ្តល់កម្លាំងចិត្តបន្ថែមដើម្បីមាមីងឆ្លងកាត់លំបាក ឆ្ពោះដល់ជីវភាពកាន់តែប្រសើរជាងទៀត៕
ទីទុយ - វិមាន