សម្រាប់ស្ត្រីមេផ្ទះអាចនឹងស្វែងយល់វិធីធ្វើជ្រក់ផ្លែល្វា រសជាតិ ជូរអែមនិងហឹរតិចៗ ធ្វើឱ្យមានតុល្យភាពរសជាតិសម្រាប់ម្ហូបអាហារឱកាសបុណ្យចូលឆ្នាំថ្មីវៀតណាម។
ធ្វើជ្រក់ផ្លែល្វារសជាតិជូរហឹរ បំបាត់ការណាយម្ហូបអាហារឱកាសបុណ្យចូលឆ្នាំថ្មីវៀតណាម។ រូបថត៖ ធូហឿង
បុណ្យចូលឆ្នាំថ្មីវៀតណាមជិតមកដល់ការរៀបចំមុខម្ហូប ឆ្ងាញ់សម្រាប់ឱកាសបុណ្យចូលឆ្នាំថ្មី ក៏បានស្ត្រីមេផ្ទះជាច្រើនយកចិត្តទុកដាក់។ ក្នុងចំណោមមុខម្ហូបទាំងនោះ មានជ្រក់ហូបផ្ទាប់ ជួយបំបាត់ការណាយម្ហូបអាហារ ឧទាហរណ៍ ដូចជា ជ្រក់ ផ្លែល្វារសជាតិហឹរជូរអែម ស្រួយ ជាមុខម្ហូបកំពុងពេញនិយម។
ដើម្បីធ្វើបានជ្រក់ផ្លែល្វាមួយក្រឡយ៉ាងឆ្ងាញ់សម្រាប់គ្រួសារ ទទួលទានក្នុងឱកាសបុណ្យចូលឆ្នាំថ្មីវៀតណាម ស្ត្រីមេផ្ទះគួរត្រៀមគ្រឿងផ្សំ រួមមានផ្លែល្វាស្រស់១គីឡូក្រាម (គួរជ្រើសយកផ្លែល្វាតូច ដើម្បីឱ្យមានកម្រិតស្រួយនិងចតតិចជាងល្វាធំ) ខ្ទឹមស ២ មើម រំដេង ១ មើមតូច ម្ទេសដៃនាងពី ៥-៧ ផ្លែ។
ចំណែកគ្រឿងទេសសម្រាប់ធ្វើទឹកត្រាំ រួមមាន៖ ទឹកស្អាត ១ លីត្រ អំបិលគ្រាប់ស្ករសនិងទឹកខ្មេះអង្ករ (ឬទឹកក្រូចឆ្មារ)។
ការច្នៃផ្លែល្វាបណ្ដោះអាសន្ន គឺជាកត្តាកំណត់នូវពណ៌និងកម្រិត ស្រួយរបស់ផលិតផលជ្រក់។ ហេតុនេះ ពេលទិញផ្លែល្វាមកត្រូវបេះទងចេញ លាងឱ្យជ្រះ។ ត្រៀមក្លាំទឹកមួយដែលលាយអំបិល១ស្លាបព្រានិងទឹកក្រូចឆ្មារ ១ ផ្លែ។ ហាន់ផ្លែល្វាជាចំណិតស្តើងៗ ឬពុះជាពីរតាមការចូលចិត្ត រួចដាក់ត្រាំក្នុងទឹកដែលបានត្រៀមនោះ។
ការត្រាំផ្លែល្វាក្នុងទឹកអំបិលនិងទឹកក្រូចឆ្មារ ក្នុងរយៈពេលពី ២០-៣០ នាទីជួយជម្រះជ័រ បំបាត់រសជាតិចត់និងរក្សាសាច់ផ្លែល្វានៅសស្អាត មិនជាំខ្មៅ។ បន្ទាប់មក ស្រង់ផ្លែចេញលាងទឹកឱ្យបានច្រើនដង រួចទុកឱ្យស្រក់ទឹក។
ក្នុងពេលរង់ចាំផ្លែល្វាស្ងួតទឹក លោកអ្នកយកគ្រឿងផ្សំលាង សម្អាត ដូចជា៖ បកសំបកខ្ទឹមស រួចហាន់ជាចំណិតស្តើងៗ យកម្ទេសលាងឱ្យស្អាត កាត់ជាកង់ៗឬទុកទាំងមូលក៏បាន រីឯរំដេង កោសសំបក រួចហាន់ជាសរសៃឬហាន់ជាចំណិតស្តើងៗ ដើម្បីបង្កើនក្លិនឈ្ងុយប្រហើរ។
ទឹកត្រាំជ្រក់ ត្រូវបានលាយផ្សំនឹងទឹកស្អាតដាំពុះ ១ លីត្រ បង់បន្ថែមស្ករស អំបិលនិងទឹកខ្មេះតាមអត្រាដែលបានកំណត់។ កូរ គ្រឿងទេសឱ្យរលាយសព្វ រួចបិទភ្លើងចង្ក្រានទុកឱ្យត្រជាក់។ ស្ត្រី មេផ្ទះគួរចំណាំ ទឹកត្រាំត្រូវទុកឱ្យត្រជាក់ត្រឹមត្រូវ ទើបចាក់ចូលក្រឡត្រាំជ្រក់ដើម្បីកុំឱ្យផ្លែល្វាទន់ជ្រាយ។
បន្ទាប់មក រៀបដាក់ផ្លែល្វាមួយស្រទាប់ រួចដាក់ខ្ទឹមស ម្ទេសនិងរំដេងមួយស្រទាប់ឆ្លាស់គ្នាក្នុងក្រឡកែវស្អាត (ដែលបានលាងដោយទឹកពុះ និងទុកឱ្យស្ងួត)។ ចាក់ល្បាយទឹកត្រាំឱ្យលិចផ្លែល្វា។ យកបន្ទះឫស្សី ឬប្រទាសសង្កត់ខ្ទាស់ឱ្យជាប់ ដើម្បីធានាផ្លែល្វា លិចក្នុងទឹកជានិច្ច ជៀសវាងស្ថានភាពផ្អូមដុះផ្សិតឬជាំខ្មៅ។
ដាក់ក្រឡជ្រក់នៅកន្លែងត្រជាក់ ក្រោយរយៈពេលពី ២-៣ ថ្ងៃ ពេលផ្លែល្វាប្រែទៅជាពណ៌លឿងស្រអាប់ គឺអាចទទួលទានបាន។ ជ្រក់ឆ្ងាញ់ស្រួយ មានរសជាតិជូរ ហឹរ ប្រៃនិងផ្អែមល្មមហូប គ្មាននៅជាតិចត់។ មុននឹងទទួលទាន អាចលាយគ្រឿងផ្សំទឹកម្ទេសបន្តិច ឬជីរដើម្បីបង្កើនរសជាតិឆ្ងាញ់៕
ប្រភព៖ laodong.vn - មុនី